E noho nei au i tōku taumata kōrero, i Te Tapuae o Uenuku,

Ka kai ōku mata ki waho, ki a Raukawakawa Moana, te ara tēnā i ū mai ai tōku tupuna ki Anamāhanga, e ko Te Huataki e!

Whakawhiti atu, whakawhiti mai, auraki mai ana ko ngā mana whakatiketike i ahau, ko Te Whakamana, ko Tūkauae, ko Te Rerewa, ko Te Heiwi, nā te moenga i a Ngāi Tara, i a Ngāti Māmoe, ko noho ko te waikanaetanga, poua ana ko te mana o Rangitāne ki Te Tau Ihu o Te Waka a Māui e!

Māreparepa mai ana ngā wai-rau o Ruatere, ngā rohe kōreporepo, te wai māhitihiti o ngā mātua tūpuna, ko Te Wairau e kāpikopiko ana i te hōkikitanga, te whaonga mai i te whenua ka rere ki te pūruatanga, kō ōna pūahatanga kei Te Koko-o-Kupe, kei Te Pokohiwi-o-Kupe.

Kei runga rā ko Parinui-o-Whiti, Te Taumanu o Te Matahourua, ko Te Kopi-o-Kupe.

E hora rā ko Te Pokohiwi-o-Kupe, te taunahanahatanga o te iwi taketake nō raurangi e!

Ngā wai tuku kiri o Te Ara-o-pipi, o Mataora, hoki whakauta au ki te keokeonga ki Rahotia, te mana, te ihi, te wehi i a rātau mā heke iho ki ahau e!

He uri nō te tini whetū ki te rangi, ko Rangitāne ki te whenua!

Kei puta Te Wairau!